ແຜນງານການຂົນສົ່ງເມືອງ Seattle | ແຜນງານການຂົນສົ່ງທີ່ທ່ານນາຍົກເທດສະມົນຕີ Bruce Harrell ແນະນຳໃຫ້ສະພາເທດສະບານເມືອງເພື່ອນຳໄປໃຊ້ 

ບົດສະຫຼຸບ 

• ພວກເຮົາໄດ້ຈັດທຳແຜນງານການຂົນສົ່ງເມືອງ Seattle (STP) ສຳເລັດແລ້ວຫຼັງຈາກສອງປີຂອງການມີສ່ວນພົວພັນຂອງສາທາລະນະ ແລະ ໄດ້ແບ່ງປັນກັບສະພາເທດສະບານເມືອງແລ້ວໃນມື້ນີ້! ທ່ານສາມາດຮຽນຮູ້ເພີ່ມເຕີມກ່ຽວກັບແຜນງານຢ່າງໄວວາໄດ້ ທີ່ນີ້ ແລະ ເບິ່ງແຜນງານສະບັບເຕັມໄດ້ ທີ່ນີ້. 
• ໃນລະດູໃບໄມ້ຫຼົ່ນປີ 2023 ພວກເຮົາໄດ້ຮ້ອງຂໍໃຫ້ມີຄໍາຕິຊົມຂອງປະຊາຊົນກ່ຽວກັບຮ່າງ STP. ພວກເຮົາໄດ້ເອົາຄໍາຕິຊົມນີ້ມາໃຊ້ ແລະ ພວກເຮົາເຮັດການປ່ຽນແປງທີ່ສໍາຄັນເພື່ອໃຫ້ສອດຄ່ອງກັບແຜນງານດັ່ງກ່າວ.  
• ໃນຂະນະນີ້ສະພາເທດສະບານເມືອງຈະພິຈາລະນາແຜນງານຕາມຄຳແນະນຳຂອງທ່ານນາຍົກເທດສະມົນຕີ Harrell ເພື່ອນຳໄປໃຊ້. 
• ເມື່ອນຳໄປໃຊ້ ແຜນງານການຂົນສົ່ງເມືອງ Seattle ຈະກາຍເປັນວິໄສທັດຂອງເມືອງ Seattle ສໍາລັບອະນາຄົດຂອງການຂົນສົ່ງໃນເມືອງ. 
• ທີ່ສໍາຄັນ ພວກເຮົາຍັງຂໍຂອບໃຈພັນທະມິດອົງການຈັດຕັ້ງໃນຊຸມຊົນຂອງພວກເຮົາສໍາລັບການນໍາພາ ແລະ ຄວາມຮ່ວມມືຂອງເຂົາເຈົ້າໃນການພັດທະນາແຜນງານການຂົນສົ່ງເມືອງ Seattle.   
• ເພື່ອສືບຕໍ່ຮັບຊາບກ່ຽວກັບແຜນງານການຂົນສົ່ງເມືອງ Seattle ກະລຸນາລົງທະບຽນເພື່ອຮັບຂໍ້ມູນອັບເດດທາງອີເມວໂດຍການຄລິກທີ່ນີ້ ແລະ ໝາຍເອົາກ່ອງທີ່ມີຫົວຂໍ້ “ຈົດໝາຍຂ່າວ SDOT.” 

ຫຼັງຈາກສອງປີຂອງການມີສ່ວນພົວພັນຂອງປະຊາຊົນ ພວກເຮົາໄດ້ພັດທະນາແຜນງານການຂົນສົ່ງເມືອງ Seattle ທີ່ແນະນໍາ ແລະ ແບ່ງປັນກັບສະພາເທດສະບານເມືອງແລ້ວໃນມື້ນີ້. 

ແຜນງານການຂົນສົ່ງເມືອງ Seattle ແມ່ນວິໄສທັດ 20 ປີສໍາລັບອະນາຄົດຂອງຖະໜົນ, ທາງຍ່າງ ແລະ ພື້ນທີ່ສາທາລະນະຂອງເມືອງ Seattle ທີ່ໄດ້ຮັບແຈ້ງຈາກປະຊາຊົນຫຼາຍພັນຄົນທີ່ອາໄສຢູ່, ເຮັດວຽກ ແລະ ເຮັດກິດຈະກຳໃນເມືອງ Seattle. ແຜນງານການຂົນສົ່ງເມືອງ Seattle ກຳນົດວິໄສທັດ, ເປົ້າຫມາຍ, ຄວາມເຄື່ອນໄຫວທີ່ສໍາຄັນ ແລະ ຄໍາແນະນໍາສໍາລັບລະບົບການຂົນສົ່ງທີ່ເໝາະສົມກັບເມືອງຂອງພວກເຮົາທັງໃນປັດຈຸບັນ ແລະ ໃນອະນາຄົດ. ແຜນງານນີ້ຈະແຈ້ງໃຫ້ຮູ້ ແລະ ຊ່ວຍກຳນົດທຸກຢ່າງຕັ້ງແຕ່ການລະດົມທຶນດ້ານການຂົນສົ່ງໃນອະນາຄົດໄປຈົນຮອດໂຄງການ ແລະ ໂປຣແກຣມຕ່າງໆທີ່ຍົກລະດັບວິທີທີ່ພວກເຮົາເພີດເພີນກັບພື້ນທີ່ສາທາລະນະ ແລະ ການເດີນທາງໄປທົ່ວເມືອງ. 

ແຜນງານການຂົນສົ່ງເມືອງ Seattle ໄດ້ສຸມໃສ່ເປົ້າຫມາຍຫຼັກທີ່ສໍາຄັນສໍາລັບເມືອງ Seattle ດັ່ງຕໍ່ໄປນີ້: 

• ຄວາມປອດໄພ 
• ຄວາມສະເໝີພາບ 
• ຄວາມຍືນຍົງ 
• ຄວາມຄ່ອງຕົວ ແລະ ຄວາມສາມາດໃນການຢູ່ຮອດທາງເສດຖະກິດ 
• ຄວາມໜ້າຢູ່ອາໄສ 
• ການບໍາລຸງຮັກສາ ແລະ ຄວາມທັນສະໄຫມ 

ໃນລະດູໃບໄມ້ຫຼົ່ນປີ 2023 ພວກເຮົາໄດ້ຮ້ອງຂໍໃຫ້ມີຄໍາຕິຊົມຂອງປະຊາຊົນກ່ຽວກັບຮ່າງແຜນງານການຂົນສົ່ງເມືອງ Seattle.  

ເຊິ່ງລວມເຖິງການມີສ່ວນພົວພັນທາງອອນລາຍໃນທົ່ວເມືອງ, ການເຂົ້າຮ່ວມກິດຈະກໍາແບບພົບໜ້າ ແລະ ການເຮັດວຽກຮ່ວມກັບ ພະແນກປະສານງານຊຸມຊົນຂອງຊຸມຊົນໃນລະແວກໃກ້ຄຽງ ເພື່ອດໍາເນີນການເຜີຍແຜ່ທີ່ສຸມໃສ່ຊຸມຊົນດັ່ງຕໍ່ໄປນີ້: BIPOC (ຄົນຜິວສີ, ຄົນພື້ນເມືອງ ແລະ ຄົນຜິວສີອື່ນໆ), ຜູ້ທີ່ມີລາຍໄດ້ຕ່ຳ, ຄົນເຂົ້າເມືອງ ແລະ ຄົນອົບພະຍົບ, ຜູ້ສູງອາຍຸ, ແມ່ຍິງ, ຜູ້ທີ່ປະສົບກັບການຂາດທີ່ຢູ່ອາໃສ ຫຼື ຄວາມບໍ່ຫມັ້ນຄົງດ້ານທີ່ຢູ່ອາໄສ ແລະ ຜູ້ທີ່ມີຄວາມພິການ.  

ຂັ້ນຕອນຫຼາຍຢ່າງຂອງລັດຖະບານເກີດຂຶ້ນໂດຍທຸກຝ່າຍມີໂອກາດເທົ່າທຽມກັນໃນການສະແດງຄຳຄິດເຫັນແລະເຮັດວຽກຮ່ວມກັນ ບໍ່ວ່າຈະແບບພົບໜ້າ ຫຼື ທາງອອນລາຍ. ການສ້າງ STP ແມ່ນແຕກຕ່າງກັນເພາະວ່າເຈົ້າໜ້າທີ່ຂອງພວກເຮົາມີຄວາມຕັ້ງໃຈທີ່ຈະນຳໂອກາດທີ່ເທົ່າທຽມກັນໄປຫາຜູ້ທີ່ຍັງບໍ່ຮູ້ວ່າມີການເປີດໂອກາດໃຫ້ເຂົ້າຮ່ວມ. ໂດຍໃຊ້ວິທີການທີ່ເປັນນະວັດຕະກຳຈາກໂຄງຮ່າງຄວາມສະເໝີພາບດ້ານການຂົນສົ່ງ (Transportation Equity Framework) ຂອງພວກເຮົາ ພວກເຮົາໄດ້ຈັດການສົນທະນາໃນຫຼາຍສະຖານທີ່ ແລະ ຫຼາຍພາສາກັບກຸ່ມຄົນ, ສະມາຊິກໃນຊຸມຊົນ ແລະ ທຸລະກິດທີ່ຫຼາກຫຼາຍທີ່ບໍ່ເຄີຍມີສ່ວນຮ່ວມໃນຂັ້ນຕອນດັ່ງກ່າວມາກ່ອນ. ພວກ​ເຮົາ​ຮູ້ສຶກເປັນ​ກຽດ​ທີ່​ໄດ້​ພົບ​ປະ​ກັບ​ສະ​ມາ​ຊິກ​ທົ່ວ​ຊຸມ​ຊົນທີ່ແຕກຕ່າງດ້ານອັດຕາລັກທາງ​​ສັງ​ຄົມ, ພາ​ສາ ແລະ ​ປະ​ສົບ​ການ​ທາງວັດ​ທະ​ນະ​ທໍາ. ພວກເຮົາໄດ້ຈັດການສົນທະນາກັບກຸ່ມຊຸມຊົນຊົນພື້ນເມືອງ ແລະ ຜູ້ອົບພະຍົບໃນເມືອງຂອງພວກເຮົາ, ຮັບຟັງຫົວຂໍ້ຕ່າງໆທີ່ລວມເຖິງການເຄົາລົບລະບົບນິເວດຂອງເມືອງ, ການປັບປຸງຄວາມປອດໄພສໍາລັບຜູ້ເດີນທາງທີ່ມີຄວາມສ່ຽງທີ່ສຸດຂອງພວກເຮົາ ແລະ ການແກ້ໄຂການຕັດສິນໃຈວາງແຜນການຂົນສົ່ງທີ່ຜ່ານມາໃນອະດີດທີ່ເຮັດໃຫ້ຊຸມຊົນແຕກແຍກ ແທນທີ່ຈະເຮັດໃຫ້ຄົນຢູ່ຮ່ວມກັນໄດ້. – Greg Spotts ຜູ້ອໍານວຍການ SDOT  

ພວກເຮົາຂໍຂອບໃຈຜູ້ທີ່ໄດ້ຊ່ວຍພວກເຮົາກຳນົດແຜນງານໂດຍການໃຫ້ຄໍາເຫັນຫຼາຍກວ່າ 1,300 ຄຳເຫັນກ່ຽວກັບແຜນງານ ແລະ ຫຼາຍກວ່າ 1,000 ຄໍາເຫັນກ່ຽວກັບໂຄງການ ແລະ ໂປຣແກຣມ. 

ນີ້ແມ່ນບາງສ່ວນທີ່ພວກເຮົາໄດ້ຍິນ:  

• STP ຄວນມີຄວາມກ້າຫານ ແລະ ງ່າຍຕໍ່ການດຳເນີນການ. 
• ຄວາມປອດໄພຄວນຈະເປັນຈຸດສົນໃຈຫຼັກຂອງພວກເຮົາ ແລະ ເປັນສິ່ງທີ່ພວກເຮົາໃຫ້ຄວາມສໍາຄັນ. 
• ມາຮ່ວມເຮັດວຽກກ່ຽວກັັບການແກ້ໄຂບັນຫາການປ່ຽນແປງສະພາບດິນຟ້າອາກາດກັນເຖາະ. 
• ພວກເຮົາຕ້ອງການໃຫ້ແນ່ໃຈວ່າຖະໜົນ ແລະ ພື້ນທີ່ສາທາລະນະຂອງພວກເຮົາສາມາດຮອງຮັບເສດຖະກິດທ້ອງຖິ່ນທີ່ເຂັ້ມແຂງໄດ້. 
• ພວກເຮົາຈໍາເປັນຕ້ອງພິຈາລະນາປັດໄຈ ແລະ ຂໍ້ແລກປ່ຽນທັງໝົດທີ່ກ່ຽວຂ້ອງໃນການຕັດສິນໃຈເລືອກວິທີທີ່ພວກເຮົາໃຊ້ຖະໜົນຂອງພວກເຮົາ. 
• ມາຮ່ວມເຮັດໃຫ້ການດຳເນີນງານມີຄວາມສະເພາະເຈາະຈົງ ແລະ ກຳນົດວິທີທີ່ພວກເຮົາວັດແທກຄວາມກ້າວໜ້າໃຫ້ຊັດເຈນ. 
• ພວກເຮົາຈຳເປັນຕ້ອງໃຫ້ໂອກາດແກ່ທ່ານຫຼາຍຂຶ້ນໃນການມີສ່ວນຮ່ວມ ແລະ ສະແດງຄວາມຄິດເຫັນຂອງທ່ານ. 
• ທ່ານຢາກໃຫ້ພວກເຮົາປ່ຽນແປງຢ່າງໄວວາເພື່ອປັບປຸງລະບົບການຂົນສົ່ງຂອງພວກເຮົາໃນຂະນະທີ່ຍັງຄົງຮັກສາສິ່ງທີ່ພວກເຮົາມີໃຫ້ຢູ່ໃນສະພາບທີ່ດີ. 

ທີ່ສໍາຄັນ ພວກເຮົາຍັງຂໍຂອບໃຈພັນທະມິດອົງການຈັດຕັ້ງໃນຊຸມຊົນຂອງພວກເຮົາສໍາລັບການນໍາພາ ແລະ ຄວາມຮ່ວມມືຂອງເຂົາເຈົ້າໃນການພັດທະນາແຜນງານການຂົນສົ່ງເມືອງ Seattle. 

ຂ້າງລຸ່ມນີ້ແມ່ນລາຍຊື່ພັນທະມິດອົງການຈັດຕັ້ງໃນຊຸມຊົນທັງໝົດໃນວຽກງານນີ້: 

• ພັນທະມິດແຮງງານອາເມຣິກາແຫ່ງອາຊີປາຊີຟິກ (Asian Pacific American Labor Alliance) 
• Central Area Collaborative​ 
• ສະມາຄົມຄວາມຍືນຍົງຂອງ Duwamish Valley (DVSA)  
• ຫໍສະຫມຸດຂອງ Estelita (Estelita’s Library) 
• Khmer Community of Seattle King County in partnership with Noio Pathways & Kim Yu Consulting  
• Legacy of Equality Leadership and Organizing (LELO)  
• Smash the Box 

ພວກເຮົາຮັບຟັງຄໍາຄິດເຫັນຂອງຊຸມຊົນ ແລະ ເຮັດການປ່ຽນແປງທີ່ສຳຄັນບາງຢ່າງຕໍ່ກັບແຜນງານການຂົນສົ່ງເມືອງ Seattle.  

ນີ້ແມ່ນຍຸດທະສາດຫຼັກໃໝ່ທີ່ພວກເຮົາໄດ້ເພີ່ມເຕີມເຂົ້າມາ. 

• ຄວາມປອດໄພ: ພວກເຮົາຕ້ອງການເຮັດໃຫ້ແນ່ໃຈວ່າເຄືອຂ່າຍການຂົນສົ່ງຂອງພວກເຮົາມີຄວາມທົນທານ ແລະ ກຽມພ້ອມສໍາລັບເຫດການສຸກເສີນ. 
• ການບັງຄັບໃຊ້ທີ່ບໍ່ມີການລົງໂທດ: ພວກເຮົາກຳລັງສະໜັບສະໜູນການປ່ຽນແປງວິທີການນຳໃຊ້ກົດໝາຍຈະລາຈອນ. ພວກເຮົາບໍ່ຕ້ອງການທີ່ຈະສຸມໃສ່ການລົງໂທດ. ສິ່ງນີ້ຊ່ວຍເຮັດໃຫ້ຖະໜົນຂອງພວກເຮົາປອດໄພຂຶ້ນ ພ້ອມກັບຫຼຸດຜ່ອນອັນຕະລາຍຕໍ່ຊຸມຊົນໃນຂະນະດຽວກັນ.  

ພວກ​ເຮົາ​ໄດ້​ຂະຫຍາຍ​ເປົ້າ​ໝາຍ​ຂອງພວກເຮົາດ້ານຄວາມຄ່ອງຕົວໂດຍ​ຄຳນຶງເຖິງຄວາມ​ສຳຄັນ​ຂອງ​​ຄວາມສາມາດໃນການຢູ່ຮອດທາງ​ເສດຖະກິດເພື່ອ​ເນັ້ນ​ເຖິງ​ຄວາມ​ສຳຄັນ​ຂອງ​ການ​ນຳພາປະຊາຊົນ ​ແລະ ສິນຄ້າ​ໄປ​ສູ່ຈູດໝາຍທີ່​ຕ້ອງການ.  

ພວກເຮົາໄດ້ຂະຫຍາຍຍຸດທະສາດການດຳເນີນງານຂອງພວກເຮົາເພື່ອໃຫ້ລາຍລະອຽດເພີ່ມເຕີມກ່ຽວກັບວິທີທີ່ພວກເຮົາຈະເຮັດໃຫ້ວິໄສທັດໃນອະນາຄົດນີ້ເປັນຈິງ. ພວກເຮົາໄດ້ເພີ່ມການດຳເນີນການເກືອບ 30 ຢ່າງທີ່ເປັນຮູບປະທຳທີ່ເອີ້ນວ່າ ການດຳເນີນການ” ເພື່ອຊ່ວຍເຮັດໃຫ້ຂັ້ນຕອນທີ່ສໍາຄັນເກີດຂຶ້ນ. ພາກນີ້ອະທິບາຍວ່າພວກເຮົາຈະເລືອກໂຄງການ ແລະ ໂປຣແກຣມເພື່ອເຮັດວຽກແນວໃດ. ພວກເຮົາແບ່ງປັນວິທີທີ່ພວກເຮົາຈະຈັດລະບຽບວຽກງານໂດຍອີງໃສ່ຊັບພະຍາກອນທີ່ມີຢູ່ ແລະ ກໍານົດວິທີທີ່ພວກເຮົາອາດຈະຈ່າຍຄ່າໃຊ້ຈ່າຍສຳລັບວຽກງານ. ສຸດທ້າຍນີ້ ພວກເຮົາເຮັດໂຄງຣ່າງວິທີທີ່ພວກເຮົາຈະຕັດສິນໃຈທີ່ສໍາຄັນໃນອະນາຄົດ. 

ຕໍ່ໄປ ສະພາເທດສະບານເມືອງຈະພິຈາລະນາແຜນໃນການນຳເອົາແຜນງານໄປໃຊ້. 

ພວກ​ເຮົາ​ຫວັງ​ວ່າ​ທ່ານ​ຈະ​ສືບ​ຕໍ່​ເຫັນ​ສຽງ​ຂອງ​ທ່ານ ແລະ​ ຂອງເພື່ອນ​ບ້ານ​ຂອງ​ທ່ານ​ທີ່​ສະ​ທ້ອນ​ໃຫ້​ເຫັນ​ໃນ​ແຜນ​ງານ​ນີ້. 

ທ່ານສາມາດຕິດຕໍ່ສື່ສານກັບສະພາເທດສະບານເມືອງ ແລະ ສະແດງຄຳຄິດເຫັນຂອງທ່ານກ່ຽວກັບແຜນງານການຂົນສົ່ງເມືອງ Seattle ໂດຍການສົ່ງຄໍາຄິດເຫັນເປັນລາຍລັກອັກສອນ ຫຼື ໂດຍການເຂົ້າຮ່ວມໃນຊ່ວງສະແດງຄໍາຄິດເຫັນສາທາລະນະໃນລະຫວ່າງການປະຊຸມສະພາເທດສະບານເມືອງທີ່ຈະມີຂຶ້ນໃນວັນທີ 5 ມີນານີ້. ທ່ານຍັງສາມາດສົ່ງອີເມວຫາສະພາເທດສະບານເມືອງໄດ້ໂດຍກົງເຊັ່ນກັນ. ທ່ານສາມາດຮຽນຮູ້ວິທີເຂົ້າຮ່ວມການປະຊຸມເຫຼົ່ານີ້ໄດ້ເມື່ອມີວາລະດັ່ງກ່າວໃນວັນທີ 1 ມີນາຢູ່ໃນໜ້າເວັບນີ້. 

ເມື່ອນຳມາໃຊ້ແລ້ວ ແຜນງານການຂົນສົ່ງເມືອງ Seattle ຈະກາຍເປັນວິໄສທັດຂອງເມືອງ Seattle ຢ່າງເປັນທາງການສໍາລັບອະນາຄົດຂອງການຂົນສົ່ງໃນເມືອງ. 

ມີການສະເໜີໃຫ້ສ້າງ ແລະ ອັບເດດແຜນການດຳເນີນການຕາມແຜນງານການຂົນສົ່ງເມືອງ Seattle ທຸກໆ 4 ປີ ເຊິ່ງຈະຊ່ວຍໃຫ້ພວກເຮົາສາມາດປັບຕົວໃຫ້ເຂົ້າກັບເງື່ອນໄຂທາງດ້ານການເງິນທີ່ປ່ຽນແປງ, ລຳດັບຄວາມສຳຄັນຂອງຊຸມຊົນ ແລະ ບັນຫາທີ່ເກີດໃໝ່ໄດ້. ແຜນການດຳເນີນການຕາມແຜນງານການຂົນສົ່ງເມືອງ Seattle ຈະຄອບຄຸມ ແລະ ມີຈຸດປະສົງເພື່ອທົດແທນແຜນການດຳເນີນການທາງຍ່າງ, ລົດຖີບ, ການຂົນສົ່ງສາທາລະນະ ແລະ ການຂົນສົ່ງສິນຄ້າທີ່ມີການພັດທະນາຂຶ້ນໃນອະດີດ. 

ພວກເຮົາກຳລັງດຳເນີນການຕາມແຜນການຈັດຫາເງີນທຶນສຳລັບການຂົນສົ່ງເພື່ອປັບໃຫ້ເຂົ້າກັບການປ່ຽນແປງດ້ານເງິນທຶນ. ເງິນທຶນຈະເປັນສິ່ງຕັດສິນວິທີທີ່ພວກເຮົາຈະເຮັດໃຫ້ແຜນດັ່ງກ່າວເກີດຂຶ້ນໄດ້ໄວປານໃດໃນອີກ 20 ປີຂ້າງໜ້າ. ການຈັດເກັບພາສີເພື່ອຂັບເຄື່ອນເມືອງ Seattle (Levy to Move Seattle) ເຊິ່ງຈ່າຍປະມານ 30% ຂອງວຽກຂອງພວກເຮົາຈະສິ້ນສຸດລົງໃນໄວໆນີ້. ການຕໍ່ອາຍຸການຈັດເກັບພາສີຈະເປັນບາດກ້າວທໍາອິດຂອງພວກເຮົາໃນການຮັບປະກັນວ່າຈະມີເງິນທຶນເພື່ອສືບຕໍ່ປັບປຸງ ແລະ ຮັກສາລະບົບການຂົນສົ່ງຂອງເມືອງ Seattle. ກະລຸນາເຝົ້າຕິດຂໍ້ມູນເພີ່ມເຕີມກ່ຽວກັບເລື່ອງນີ້ໃນເດືອນຂ້າງຫນ້າທີ່ຈະມາຮອດ!